زجل

أول امبارح سافرت و ختِ بنتى و المدام
رحت للعرَاف اقول له ع اللى شفته فى المنام
قال لى خير احكى لى اروى لى الكلام
قلت له حلمك علىَ لما نهديك السلام
***********
كنت مهدود م التعب
والجبين معقود وبينقط غضب
وابتديت احكى له بهدوء وبأدب
قلت له ليلة الخميس التانى من شهر رجب

قام قاطعنى وقال لى من فضلك يا خال
عندى كام كلمه و بدِى اسأل سؤال
قبل ما تنام كنت متعشِى بزمان
ولاَ كانت معدتك فاضيه وجعان
كنت نايم بدرى ولاَ كنت سهران للأدان
كنت حرَان ولاَ جسمك تحت ستر الغطوه بان

قلت له خلَصت قولك ولاَ لسَه فيه كلام
قال لى إحكى يا بن والدى ع اللى شفته فى المنام
قلت له قبل الكلام شوف حتاخد منِى كام
قال لى موضوع الفلوس الكلام عنه حرام
واللى يرضى ذمِتك حاخده منَك والسلام

قلت له ماشى اتفقنا
الحقيقه واحنا فى القطر اتسرقنا
قمنا نازلين ع الحسين
توِِ ما ادِينا التحيه وصلينالنا ركعتين
خدت منديل م الوليه واشتريت لىَ عصايه
قمت بالمنديل رابط عين البنيه وابتدت تسرح معايا
خدت إيد بنتى ف ايدىَ والمدام كانت بتتعكز ورايا

كان حقيقى شكلنا يشبه تمام الشحاتين
اللى دقنه مبهدله واللى مفخوت ليها عين
قلنا لله العطيه والثواب للمحسنين
داحنا قبل السرقه كنا فى الحكومه موظفين
والقدر جابنا هنا ياهل مصر يا طيبين

هىَ شيللاه يا حسين والفلوس نزلت علينا من الشمال ومن اليمين
واكتفينا بنفس مقدار اللى كان ويَانا واحنا مبحَرين
و اعتزلنا الشغل وف حينَا جينا لك
قال لى مالى وذنبى ايه تشكى لى حالك
قول بقى يا زبونَا ايه شفته ف منامك

قلت له شفت ف منامى اتنين ضخام
طول بعرض وشفت فى عينيهم خصام
كتفونى وغمُوا عينى وبهدلونى بالحزام
قال لى كان فيه دم قلت جاى لك فى الكلام

قلَعوا سنانى ورموها
والبنيه خوِفوها
والمدام تحت تهديد المطاوى كتفوها
وف شوال واسع خدوها وجرجروها

أصلى من خيبتى الوليَه كات تخينه شويتين
والشوال غطى يدوب الجسم حتى الركبتين
قمت مفزوع قلت يا ولاد الكلاب يا مجرمين
والأكاده ان الكابوس جانى ف منامى مرتين


قال لى هات لى بكره لازم وافتكر
جوز حمام أحمر وإيد نمله دكر
هات لى فار أبيض وكتكوت معتبر

لازم الفار يبقى مصرى وعمُه خاله
والحمام يبقى يتيم يا تجيب بداله
ديك منقَط من زمان ماتت عياله

إدبح الجوز الحمام وصفِى دمُه
واخنق الكتكوت وهات الفار وسمُه
خد صباع رجله الشمال وشفِى عضمه
وابقى برضه شوف قميص واقطع له كمُه

حط إيد النمله والكتكوت فى كيس
وارمى نقطة دم فى كم القميص
قلت يا مولانا والفار الفطيس؟
قال لى اسكت قبل ما توقَعنا ف حيص وبيص

حمَر الجوز الحمام وابعت الهانم تجيبه
هات ميتين ملطوش كمان وادى للعفريت نصيبه
حط عضم الفار فى كمَك واحرقه واطفى لهيبه
واللى فى الكيس لو يهمك ياخده صاحبك أو قريبه


واستحمَى وانت تحت الدش قول
إمشى يا عفريت وقول يا شر زول
واوعى تنسى تبقى ترقع صحن فول
وابقى نام بدرى وصلِى ع الرسول

رحت نفِذت اللى قالهولى وسوَى
نمت بدرى ورحت فى النوم اللى هوه
واتفزعت لقيت واقف جنبى فتوَه
قلت له ايه العباره قام زغدنى بكل قوه

وف ذهول بصِيت لقيت الشيخ كمال
بسى من غير دقن وبسخريَه قال
حط كل اللى ف دولابك فى الشوال
وف ساعتها مراتى صحيت والعيال

قاموا ماسكين فى زمَاره رقبته
وبحديده ف إيدى نشِنت وضربته
والجيران اتلموا وانكشفت مصيبته
والسبب فى اللى حصل قلبى وطيبته

أوعوا تاكلوا من كلام العرَافين
دول فى كل كتاب تملِى ملعونين
أكل عيشهم من فلوس الشقيانين
ربنا يبيدهم وينسفهم آمين